Bledar Selmanaj, autori i dyshuar për vrasjen e të riut Xhuljano Bullari në Vlorë ka tentuar vetëvrasjen. Bëhet me dije se Selmanaj e ka ndërmarrë aktin ekstrem rreth orës 19.00 në ambientet e burgut të Peqinit.
Ndërhyrja në kohë e administratës së burgut ka bërë të mundur shpëtimin e jetës së Bledarit, i cili ndodhet nën masën e sigurisë “arrest me burg”.
Përmendim faktin se vrasja u regjistrua në Babicë të Vlorës. Një nga pistat ku po hetohet lidhet me faktin se Bullari mund të jetë vrarë nga Selmanaj për paratë e një sasie rreth 100 kg lëndë narkotike kanabis.
25-vjeçari bashkë me grupin e tij i ka blerë 39-vjeçarit sasinë e drogës me lekë të falsifikuara. Për këtë arsye kishte presion të vazhdueshëm nga Bledar Selmanaj për paratë. Mirëpo, autori i dyshuar nuk ka pranuar autorësinë e krimit. Referuar burimeve ai i ka thënë grupit hetimor se udhëtoi pasditen e të premtes me Xhuljano Bullarin nga Tirana në Vlorë por ndaloi në banesën e tij.
Atë mbrëmje fjeti aty dhe të nesërmen u kthye sërish në Tiranë. Ndërsa nuk ka dhënë asnjë informacion se ku do të shkonte më pas Xhuljano Bullari. Ky i fundit u gjet të shtunën në mëngjes i vrarë me një plumb në kokë në makinën e kushërirës së tij në një zonë të Babicës së Vlorës.
