Kompania ajrore paralajmëron: Biletat e avionëve mund të shtrenjtohen deri në 20% në 2027

Udhëtimet ajrore në Europë mund të kushtojnë ndjeshëm më shumë vitin e ardhshëm. Drejtori ekzekutiv i Ryanair, Michael O’Leary, paralajmëron se çmimet e biletave mund të rriten deri në 20%, për shkak të shtrenjtimit të karburantit dhe pasojave të konfliktit në Lindjen e Mesme. Një biletë avioni që sot kushton 100 euro mund të shkojë në 120 euro në vitin 2027, nëse realizohet skenari i rritjes maksimale të parashikuar nga drejtuesi i Ryanair. Shtrenjtimi i karburantit dhe pasiguritë gjeopolitike po shtojnë presionin mbi industrinë e aviacionit, me pasoja të mundshme për buxhetin e udhëtarëve në Europë.

Gjatë një konference për shtyp në Bruksel, Michael O’Leary deklaroi se tarifat ajrore mund të rriten me 10%, 15% apo deri në 20% gjatë 12 muajve të ardhshëm. Sipas tij, kostot e larta të karburantit po vënë në vështirësi përfitueshmërinë e kompanive ajrore, ndërsa disa operatorë mund të përballen me falimentime ose bashkime.

Një zhvillim i tillë mund të ndikojë edhe në ofertën e fluturimeve, duke reduktuar numrin e vendeve të disponueshme për pasagjerët dhe duke ushtruar presion të mëtejshëm mbi çmimet. Për të kufizuar ndikimin e luhatjeve të tregut, Ryanair ka siguruar paraprakisht rreth 80% të nevojave për karburant deri në mars 2027, me një çmim prej 67 dollarësh për fuçi. Megjithatë, për periudhën pasuese, kompania ka mbuluar vetëm 15% të nevojave të saj, me një çmim prej 85 dollarësh për fuçi.

Kjo e lë kompaninë më të ekspozuar ndaj rritjeve të mëtejshme të çmimit të karburantit, një prej kostove kryesore të operimit të linjave ajrore. Pavarësisht mundësisë së rritjes së tarifave, O’Leary paralajmëron se të ardhurat shtesë nga biletat mund të mos mjaftojnë për të kompensuar plotësisht kostot e larta. Nëse parashikimi materializohet, udhëtarët europianë mund të përballen me bileta më të shtrenjta gjatë vitit 2027, ndërsa presioni mbi kompanitë ajrore mund të ndikojë në konkurrencën dhe ofertën e fluturimeve.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern