U vaksinua me Pfizer, e reja shqiptare humb jetën, familja: E kërcënuan ta bënte, do humbte punën

Një vajzë 23-vjeçare në Drenas të Kosovës ka ndërruar jetë 2 ditë pasi ka bërë dozën e parë të vaksinës kundër koronavirusit.

Familjarët e të resë, Zarife Imeri, lajmin për vdekjen e saj e kanë shpërndarë në rrjete sociale, teksa thonë se ajo ka humbur jetën 48 orë pasi është vaksinuar, dhe hedhin akuza vajza e tyre ishte kërcënuar që ta bënte, ndryshe do të humbiste vendin e punës.

Mediat kosovare kanë kontaktuar me Qendrën e Mjekësisë Familjare në Drenas për të sqaruar informatat rreth arsyes se pse vajza nga Drenasi ka vdekur tri ditë pasi është vaksinuar dhe se a ka pasur paraprakisht ndonjë informatë shëndetësore për pacienten.

Drejtori i Qendrës Kryesore të Mjekësisë Familjare në Drenas, Ismet Bogiqi, ka deklaruar se vajza është vaksinuar më datën 13 shtator, në procedurë të rregullt.

“Vajza është vaksinuar me procedurë të rregullt, më 13 shtator, ka marrë dozën e parë të vaksinës Pfizer. Nuk ka pasur ndonjë problem gjatë vaksinimit, Mjekësia ligjore tash do të merret me rastin”, deklaroi ai.

Ministria e Shëndetësisë dhe Instituti Kombëtar të Shëndetit Publik (IKSHPK),  deri më tani nuk ka bërë asnjë reagim për rastin.