Refuzoi mandatin e deputetes/ Rishfaqet Najada Çomo, flet për situatën e pandemisë në vend

Pasi vendosi të refuzonte mandatin e deputetes, shefja e Spitalit Infektiv Najada Çomo ka raportuar mbi situatën e pacientëve të shtruar në spitalin C OVID1.

Ajo ka deklaruar se aktualisht, pjesa më e madhe e të shtruarve janë të pavaksinuar dhe mbi moshën 20 vjeç.

Çomo thotë se me mbushjen e kapaciteteve të spitalit COVID 1, po bëhen gati të gjitha strukturat e spitalit COVID 3 në të cilën ka kryer inspektim dhe Ministrja e Shëndetësisë, Ogerta Manastirliu.

“Pacientë të Spitalit COVID 1 kanë ardhur duke u shtuar nga fundi i korrikut deri tani në gusht. Ajo që vihet re është se ka grupmosha të ndryshme duke filluar nga 20 vjeç dhe lartë. Pjesa më e madhe e pacientëve të shtruar janë të pavaksinuar. Është një element i rëndësishëm, i bëjmë thirrje të pavaksinuarit që të marrin dozën pasi kjo është arma më e fortë për t’u mbrojtur nga COVID. Rritja e numrit të pacientëve në Spitalin COVID 1 na bëjnë që ato struktura që kanë punuar për një periudhë 1 vjeçare për spitalin COVID 3 janë të gatshme, janë struktura të gatshme dhe shtohet stafi i mjekëve” – tha Çomo.

Nga ana e Ministrisë së Shëndetësisë, bëhet e ditur se 95% e të shtruarve në spitalin infektiv janë të pavaksinuar.