Një shpërthim i fuqishëm ka ndodhur sot pranë aeroportit Hamid Karzai, në Kabul të Afganistanit.
Lajmin e dhanë dy zyrtarë amerikanë për televizionin CNN.
Një prej tyre foli për plagosje mes afganëve, ndërkohë që raportohet dhe për të shtëna.
Edhe zëdhënësi i Pentagonist, John Kirby, konfirmoi se ka pasur një shpërthim jashtë aeroportit.
“Mund të konfirmojmë një shpërthim jashtë aeroportit të Kabulit. Nuk kemi të dhëna të qarta për viktima për momentin. Do të japim detaje të reja së shpejti”, shkroi Kirby në Twitter.
Ndërkohë, Ministria e Jashtme e Italisë bën me dije se bëhet fjalë për një sulm kamikaz, që u pasua nga të shtëna me armë zjarri.
Më herët, kishte paralajmërime për një sulm “vdekjeprurës” që do të shënjestronte trupat perëndimore që po mundohen të evakuojnë civilët. Shtetet e Bashkuara të Amerikës dhe Britania e Madhe u kishin bërë thirrje shtetasve të tyre që të mos shkonin në aeroportin e Kabulit. Për motive sigurie, shërbimet sekrete të këtyre dy vendeve u kërkuan edhe qytetarëve që janë pranë aeroportit të largohen menjëherë, vetëm në rastet kur ka pasur një udhëzim nga autoritetet qeveritare. Shërbimet sekrete kishin marrë të dhëna në orët e fundit për sulm të mundshëm kamikaz pranë aeroportit nga ana e ISIS dhe për këtë arsye kanë rritur vigjilencën.
#Kabul Explosion outside Airport. pic.twitter.com/HdY9ZrP4jd
— Ravi Chaturvedi (@Ravi4Bharat) August 26, 2021
