Po shihte film në kinema, qëllohet për vdekje ylli 19-vjeçar i TikTok

Anthony Barajas, një i ri i famshëm në aplikacionin TikTok, ka humbur jetën si pasojë e plagëve të marra. Ai u plagos në momentin kur një person i armatosur hapi zjarr brenda një kinemaje në Kaliforni.

Autoritetet thanë se Barajas, 19 vjeç dhe një mikeshë e tij, Riley Goodrich, po shikonin filmin “The Forever Purge” në një kinema kur personi i armatosur hapi zjarr.

Dy të rinjtë, u gjetën nga stafi i kinemasë pas shfaqjes. Riley Goodrich ishte e vdekur, ndërsa Barajas u dërgua, me dëmtime të rënda, në një spital ku humbi betejën me plagët.

19-vjeçari njihej me nofkën “itsanthonymichael” dhe kishte rreth 1 milion ndjekës në platformën TikTok, ku ngarkonte video nga jeta e tij e përditshme.

Policia ka arrestuar 20-vjeçarin Joseph Jimenez, në shtëpinë e të cilit u gjet një armë “dhe prova të tjera që e lidhin atë me vendin e krimit”. Ndonëse disa sende u ishin vjedhur viktimave, ky nuk duket të ketë qenë motivi i sulmit.

Sipas policisë, Jimenez veproi i vetëm dhe nuk dukej se i njihte dy të rinjtë.