Kosova riatdheson 11 shtetas nga kampet famëkeqe të Sirisë

Plotë 11 shtetas nga Kosova u rikthyen në vendlindje pasi u nxorrën nga zonat e konfliktit në Siri. Lajmin e ka bërë të ditur Ministri i Brendshëm i Kosovës, Xhelal Sveçla, i cili tha  se qeveria është duke i ndihmuar ata që “të kthehen në familjet e tyre”.

“Gruaja dhe fëmijët që kemi kthyer sot kanë nevojë për ndihmën dhe mbështetjen tonë. Ne kërkojmë nga të gjithë që të respektojnë privatësinë e tyre në ditët, javët dhe muajt në vazhdim. Ata të cilët kanë kryer krime, këtu apo jashtë, do të ndiqen penalisht”, shkroi Sveçla në rrjetin social Facebook.

Shteti Islamik, i cili në një kohë ka pushtuar territore të shumta në Siri dhe Irak, është shkatërruar në vitin 2019, por mijëra shtetas të huaj që kanë luftuar përkrah tij, si dhe familjarë të tyre, kanë mbetur në zonat e luftës.

Që nga shpërthimi i konfliktit në Siri dhe Irak, në vitin 2011, rreth 400 kosovarë kanë udhëtuar drejt këtyre vendeve. Autoritetet kanë kthyer mbi 240 por sërish ka shumë burra, gra e fëmijë të cilët mbahen në kampet famkeqe të Sirisë.