Blerja e dronëve turq dhe ndërtimi i 500 banesave/ Zëdhënësi i Erdogan takohet me Ramën, ja çfarë diskutuan

Zëdhënësi i presidentit turk Rexhep Tayip Erdogan, Ibrahim Kalin ka vizituar Tiranën, ku është takuar dhe me kryeministrin Edi Rama.

Agjencia e lajmeve Anadolu, bën me dije se në takim është diskutuar mes të tjerash dhe për blerjen e dronëve turq nga ana e Shqipërisë.

Gjithashtu nuk ka ngelur pa u përmendur dhe ndërtimi i 500 banesave, që u prishën nga tërmeti.

Në një pyetje në lidhje me miratimin e buxhetit shtesë nga ana e parlamentit shqiptar për të blerë dronë nga Turqia, Kalın tha se bashkëpunimi midis dy vendeve në fushën e industrisë së mbrojtjes është i rëndësishëm dhe shtoi se ky bashkëpunim do të vazhdojë në mënyrë që të mbështetet siguria, paqja dhe stabiliteti i Shqipërisë.

“Paqja dhe stabiliteti i Shqipërisë janë edhe paqja dhe stabiliteti edhe ynë dhe paqja dhe stabiliteti i Ballkanit”, u shpreh Kalın.

Ai gjithashtu përmendi edhe 500 banesat e ndërtuara në Shqipëri pas tërmetit, duke thënë se ato pritet të finalizohen në gusht dhe t’u dorëzohen pronarëve.

“Në të njëjtën mënyrë, në këtë periudhë pandemie, veçanërisht në kontekstin e bashkëpunimit në fushën e shëndetësisë, këtu u ndërtua një spital në një kohë shumë të shkurtër, me udhëzimet e presidentit tonë. Ne patëm po ashtu mundësinë të bënim furnizim me vaksina. Në periudhën e ardhshme, ne do të vazhdojmë të thellojmë bashkëpunimin tonë me Shqipërinë në të gjitha këto fusha, përfshirë shëndetësinë”, deklaroi zëdhënësi i Presidencës së Turqisë.