Kamerierët bëjnë gjestin human, i dorëzojnë nënës së Musaenit zarfin me bakshishe

Pas vdekjes së Musaen Zenelit në masakrën e Velipojës, kamerierët e qytetit të Shkodrës vendosën që bakshishet e mbledhura bashkë me kolegët t’ja dhurojnë nënës së të riut 19-vjeçar.

Rehyl Toska, kamerieri i cili ndërmori fushatën për mbledhjen e ndihmave për familjen Zeneli një ditë më parë i dorëzoi nënës së Musaenit zarfin me bakshishet e mbledhura të cilat arritën vlerën mbi 2 milion lekë.

“Unë bëra atë që na ka takuar ne me aq kontribut që kemi dhënë. Dua të falenderoj të gjithë kolegët e mia, bizneset që janë afruar dhe gjithë shqiptarët që kanë kërkuar llogarinë e familjet. Ne nuk mund të kthejmë gjë pas, por sa do me ia lehtësuar sado pak familjes atë që po kalon. Falenderoj të gjitha mediat që kanë qenë në krah dhe gjithkënd”, tha ai për mediat.

Përmendim faktin se mesnatën e së shtunës nga përplasja me armë në Velipojë mbetën të vdekur Kujtim Ferracaku 59 vjeç, pronar i hotel “Fantazia”, vëllezërit Xhovani dhe Edmond Gocaj 25 dhe 38 vjeç që kishin hotelin “Gocaj” dhe jetimi Musaen Zeneli 20 vjeç, që e kapi një plumb në zemër dhe i mori jetën në vend.

Nga përplasja me armë mbetën të plagosur edhe Hasan Ferracaku, vëllai i biznesmenit që u vra si dhe nipi i tij Elmedin Tyli.