Mbështetje për të rinjtë, Kredo Financë dhuron për kauzat e prezantuara nga Partners Albania

Kredo Financë dhuron për kauzat e prezantuara nga Partners Albania. Jo vetëm kompania, por i gjithë stafi i saj janë angazhuar për të mbështetur me donacione nismat që u prezantuan në Ankandin e dhurimit Live #RrathëDhurues2021!, të organizuar nga Partners Albania.

Shtyllat kryesore të veprimtarisë së Kredo Financë janë zhvillimi teknologjik dhe edukimi financiar. Duke pasur këtë parasysh, Kredo Financë dhuroi një kënd teknologjie për qendrën rinore në Thumanë, duke e shoqëruar me paketë interneti për 1 vit. Në kuadër të kësaj ndihme, institucioni financiar i mikrokredisë do të ofrojë edhe trajnime të dedikuara për Edukimin Financiar për të gjithë të rinjtë e Thumanës.

Gjithashtu, punonjësit e Kredo Financë me kontributin e tyre personal do të dhurojnë 15 canta shkolle të pajisura me mjete mësimore dhe librat e duhura për studimet për 15 fëmijë të përzgjedhur nga Projekti Ura.

Ankandi i dhurimit Live #RrathëDhurues2021 këtë vit ishte vërtet emocionues, nisur nga solidariteti i treguar, veçanërisht përmes dhurimeve individuale që këtë vit ishin të konsiderueshme, duke bërë që shuma e arritur të tejkalonte ndjeshëm objektivin e synuar në mbështetje të kauzave sociale.

Shuma totale e mbledhur prej 3 milionë lekë e tejkaloi objektivin e vendosur prej 900.000 lekë në total, duke konfirmuar edhe njëherë ndjeshmërinë qytetare dhe solidaritetin ndaj komuniteteve në nevojë të kompanive dhe institucioneve, si Kredo Financë.