Virusi uli lindshmërinë/ Mjekët gjinekologë hasin raste të shtuara të ndërprerjes së shtatzënive

Mbyllja për shkak të Covidit bëri që shumë të besonin se do të kishte një ‘boom’ lindjesh. Por nuk ka rezultuar kështu.

E sapo kthyer nga një vizitë pune në Shtetet e Bashkuara gjinekologe Enriketa Kroi thotë se edhe kolegët amerikanë ndanin mendimin, se ka një trend në rënie të shtatzënive dhe lindjeve këtë vitin e fundit.
“Sot ka studime që gjen një lidhje shkak-pasojë Covid, me ndërprerjen e shtatzënisë në tremujorin e parë, personalisht kam pasur shumë raste të ndërprerjes së gravidancës në tremujorin e parë, në tremujorin e dytë apo edhe në tremojorin e fundit. Më të shprehura kanë qenë lindjet e parakohshme. Pra lindjet në muajin e gjashtë, të shtatë, të tetë, dhe shumë bebe që kanë përfunduar në inkubator”, thotë Kroi.
Shumë profesionistë kanë zhvilluar anketime dhe kanë mbledhur të dhëna që do vlejnë më pas në këtë normalitet të ri.
“Në pyetësorët që kemi zhvilluar rezultoi se gatë shtatzëna e kishin kaluar Covidin”.
Por ajo që është e çuditshme është që shumë prej tyre e kishin kaluar Covidin para se të mbeteshin shtatzënë. Dhe efektet e infeksionit që kishin kaluar, janë vërejtur në javët e avancuara të shtatzënisë.
Pyetja që shtrohet më së shumti sot është a ka lidhje mes Covidit dhe pjellorisë?
“Nuk ka studime të sotshme të cilat të kenë provuar lidhjen mes infeksionit nga Covidi dhe rënies së fertilitetit, pra aftësisë për të ngelur shtatzënë. Ama është gjetur, është parë që Covidi, proteinë që ai shfaq në sipërfaqe të qelizës së tij, bën të mundur lidhjen me një enzimë që gjendet në të gjitha qelizat epiteliale, përfshirë edhe mushkërinë, përfshirë këtu edhe qelizat epiteliale të traktit genital, mbi vezore, mbi tuba, mbi mitër dhe mbi plaçentë”.
Për femrat që e kanë kaluar Covidin dhe provojnë për një shtatzëni, por ajo nuk po ndodh mjekja ka këtë këshillë.
“Natyrisht nuk do t’i rekomandoja të prisnin 1 vit, apo një vit e gjysmë, sa parashikojnë protokollet, por brenda 6 muajve të bëjnë një kontroll për të parë ku janë, hormone, aftësinë ovuluese, pra pjekëse të vezës tek to, do ta rekomandoja një kontroll të tillë”./tch

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern