“Kjo që po ndodh është e frikshme” Gazetari ngre alarmin për fenomenin në Shqipëri: Duhet filtruar ky maskarallëk

Mbrëmjen e djeshme gazetari Mentor Kikia ka komentuar turmat e të rinjve apo fëmijëve që mezi prisnin të takonin konkurrentët e emisionit “Përputhen”.

I ftuar në programin “Të paekspozuarit” ai i ka cilësuar si paralele me edukim e frikshëm të fëmijëve përmes programeve televizive. Ai tha se në Shqipëri asnjë televizion nuk prodhon asnjë program për fëmijë, madje as televizioni kombëtar që paguhet me taksat tona. Kikia shtoi se shoqëria jonë nuk ka asnjë lloj filtri dhe njerëzit që kanë makina të mira cilësohen si elitare.

“Kjo që ndodh në Shqipëri është paralelisht një vakum i frikshëm i edukimit për fëmijë. Në Shqipëri asnjë televizion nuk prodhon asnjë program për fëmijë, as televizioni kombëtar që paguhet me taksat tona. Kanë në telefona këngë e videoklipe në vaska, me para e me drogë. Nuk kemi në shoqëri asnjë lloj filtri. Sot kemi njerëz që kanë makina të mira dhe kjo cilësohet si elitë. Duhet filtruar ky maskarallëk sepse kur të shkojnë 20 vjeç ka mbaruar ai”, tha Kikia.