Ngjarja që ka bërë më shumë bujë në rajon këto ditë është vrasja e 20 vjeçare Caroline Crouch nga burri i saj Babis Anagnostopoulos, në lagjen “Glyka Nera” në Athinë.
Ndërkohë së fundmi piloti 32 vjeçar ka shprehur pendesë për krimin e rëndë.
Ai ka pranuar përpara hetuesve krimin dhe nëpërmjet avokatëve të tij ka kërkuar falje.
Piloti grek, thotë përmes avokatëve se nuk është i interesuar për fatin e tij dhe dënimin që do të marrë, por vetëm për të ardhmen e foshnjës 12-muajshe Lidia.
Kurse avokatët e tij u shprehën për mediat greke: “Gjithçka që i intereson është fëmija i tij. Shqetësimi i tij ka të bëjë me të ardhmen e fëmijës, sepse ai ka dëgjuar gjëra të ndryshme, se fëmija do të shkojë në një familje kujdestare, se do ta humbasë atë.”
Kujtojmë që Babis për 37 ditë të tëra e fshehu vdekjen e bashkëshortes, duke pretenduar se ngjarja e rëndë ka ndodhur nga grabitësit që i hynë për të vjedhur në shtëpinë e tyre në Glyka Nera. Mirëpo vetëm tre ditë më parë, falë edhe provave të siguruara nga policia, ai pranoi krimin, duke thënë se shkaku ishte fakti që Caroline së bashku me vajzën kishte vendosur për ta braktisur atë.