Jo vetëm Mark Marku/ Pas pedagogut, një kandidat tjetër i PD rezulton pozitiv me virusin

Jo vetem pedagogu Mark Marku, por edhe një kandidat tjetër për deputet i Partisë Demokratike ka rezultuar pozitiv me C OVID19.

Bëhet fjalë për Roland Bejkon, i cili renditet i dyti në listën e qarkut të Gjirokastrës.

Lajmin e ka dhënë vetë kandidati me anë të një reagimi në rrjetet sociale.

“Të dashur miq. Për shkak të infektimit nga Covid 19 prej gati dy javësh, kam qenë i detyruar të mungoja fizikisht në fushatën elektorale që po vazhdon me intensitet në Qarkun e Gjirokastrës.

Në këto kushte kam zgjedhur që komunikimin me zgjedhësit tanë, ta mbaj nëpërmjet telefonit, rrjeteve sociale, dhe televizionit. Mezi pres të jem pranë jush. Ju faleminderit” shkruan Bejko.

Më herët ishte kandidati për deputet i PD në qarkun e Lezhës, Mark Marku, që njoftonte se ishte prekur nga COVID-19.

Me anë të një statusi në rrjetet sociale, Marku shkruan se është në gjendje të mirë shëndetësore dhe asimptomatik. Ai njofton se do të mungojë edhe disa ditë duke ndjekur këshillat e mjekëve.

“Të dashur miq! Para tre ditësh, pasi bëra tamponin dhe kontrollet mjekësore rutinë kam rezultuar pozitiv me Covid 19. Ju falenderoj përzemërsisht për qindra mesazhet mbështetëse, që kam marrë prej jush këto ditë.

Jam në gjëndje të mirë shëndetësore, asimptomatik dhe, për t’ju ruajtur shëndetin kam munguar në takimet zgjedhore.

Do të mungoj edhe disa ditë, duke ndjekur këshillat e mjekëve të cilët gjej rastin t’i falenderoj për përkushtimin, profesionalizmin dhe mbështetjen e pakursyer njerëzore. Veçanërisht, dua të falenderoj mikun dhe mjekun e shkëlqyer; Prof. As. Dr. Krenar Lilaj. Shihemi së shpejti, mes miqsh”, shkruan Marku.