E pastër në të gjitha kriteret/ Konfirmohet në detyrë kryeprokurorja e Tiranës Elisabeta Imeraj

Prokurorja Elisabeta Imeraj konfirmohet sërish në detyrë nga vettingu. Imeraj ka rezultuar e pastër në të treja kriteret e vlerësimit: pastërtia e figurës, aftësitë profesionale dhe pasuria.

Para pak ditësh, Imeraj është përzgjedhur nga KLP  si kryetare të Prokurorisë pranë Gjykatës së Shkallës së Parë Tiranë. Ajo do të mbajë këtë detyrë për një mandat 3-vjeçar.

Trupa gjykuese e KPK-së e përbërë nga Olsi Komici kryesues, Roland Ilia relator dhe Suela Zhegu anëtare, shpalli ditë e enjte vendimin për kreun e prokurorisë së Tiranës.

Elisabeta Imeraj përfundoi Shkollën e Magjistraturës në 2005 dhe punoi për 13 vite si prokurore në Prokurorinë e Krimeve të Rënda. Në gusht të vitit 2018, ajo u komandua si drejtuese e Prokurorisë së Tiranës, ndërkohë që kishte kandiduar për t’u bërë pjesë e Prokurorisë së Posaçme, SPAK.