Zgjedhjet vendore/ Balla prezanton kandidatët e qarkut të Elbasanit: Asgjë sna ndal

Kryetari i Grupit Parlamentar i Partisë Socialiste, Taulant Balla ka prezantuar sot kandidatët e PS për Bashkitë në qarkun e Elbasanit.

Balla tha se kandidatët e zgjedhur janë studiuar mirë nga PS dhe se ata do të sjellin ndryshime kolosale për qytetarët. Taulant Balla ftoi të gjithë kandidatët që të flasin për kandidimin e tyre.

Ai shtoi se qarku i Elbasanit është ndër më të mëdhatë në vend. Balla vlerësoi se janë bërë punë të shkëlqyera dhe se do të vazhdohet të bëhet punë pa fund për komunitetin, për rrugë më të mira, për infrasktrukturë më të mirë.

Arif Tafani, Belsh: Falënderoj Edi Ramën dhe Kryesinë e PS që më ka besuar një tjetër kandidim. Belshi ka ndryshuar rrënjësisht në një mandat. Edhe këtë vit të punojmë fort që të arrijmë objektivat.

Andis Salla, Cërrik: Do i kthejmë Cërrikut dinjitetin e munguar. Ka 4 vjet që udhëhiqet nga tjetër parti. Ka ardhur dita që Bashkinë e Cërrikut ta marrë PS dhe të kthejë ndryshimin

Klodian Taçe, Gramsh:  Në Gramsh është bërë ndryshim dhe do të dërgojmë më përpara atë punë që e kemi nisur në 4 vjet. Me punë do të vijë ndryshimi, sigurisht.

Kastriot Gurra, Librazhd: Është kënaqësi dhe sfidë të kandidosh nën siglën e PS. Jemi të vendosur që të ballafaqohemi në çdo lagje, në çdo vendbanim, duke mos pasur frikë, sepse kemi bërë punë. Jemi të gatshëm të kërkojmë ndjesë për ato punë që nuk i kemi arritur kur kemi dashur. Ne jemi gati të ballafaqohemi më 30 qershor dhe për të marrë fitore në Librazhd.

Qazim Sejdini, ish-kryetar i Bashkisë së Elbasanit: Kam bindjen e plotë se Elbasani do të jetë në lartësinë që i takon, duke qenë pranë sociale.

Gentjan Llatja, kandidat për Bashkinë e Elbasanit: Ne jemi të gjithë bashkë dhe jam i bindur se do ia arrijmë. Ne socialistët “konkurrojmë” veten, duke tentuar që gjithmonë të bëjmë më mirë. Ish-kryetari Qazim Sejdini ka bërë shumë punë të mirë në Elbasan, ndërsa dëshiroj dhe besoj se do ia dalim për ndryshime të mëdha në Elbasan dhe në rrethina, kudo ku kanë nevojë njerëzit.

Kreu i Grupit Parlamentar të PS Taulant Balla theksoi se shqiptarët dinë ta bëjnë dallimin mes politikanëve socialistë që punojnë për të ardhmen europiane të vendit dhe atyre që pengojnë vendin në integrimin euro-atlantik. Balla tha se PS do të jetë fituese në 7 bashkitë e qarkut Elbasan, ndërsa vuri në dukje se kandidati për Bashkinë Peqin do të zgjidhet së shpejti, pasi të studiohen kandidaturat.