LIGJET E BIZNESIT
Kreu i opozitës, Lulzim Basha ka lëshuar akuza të forta ndaj kryeministrit Edi Rama. Në momentin më të tensionuar të protestës, ai mbajti fjalën e tij para protestuesve, duke iu kujtuar se ka 30 vite që shqiptarët bëjnë sakrifica për “Shqipërinë si gjithë Europë”.
“Kemi propozuar rrugëdalje politike, propozuam vetting-un në politikë, detyrat e qeverisë tranzitore, por bashkimi i Edi Ramës me krimin ka vetëm një përgjigje: të dhunojë shqiptarët.
Kasapi i zgjedhjeve nuk do të mundet më të diktojë, zgjedhje me krimin nuk do të ketë më, armata e lirisë është ngritur në këmbë dhe bëhet gati që sot të bëjë realitet normën e parë të Shqipërisë Europiane, Zot në shtëpinë tuaj jeni ju, jo krimi”, tha Basha.
Ai i bëri thirrje protestuesve që të mos konfrontohen me policinë, pasi, siç tha ai, edhe ata janë po aq të kërcënuar nga krimi. “Mos cenoni efektivët e policisë”, iu bëri disa herë thirrje ai protestuesve. “Beteja jonë është me krimin dhe qeverinë e lidhur me krimin”, deklaroi Basha.
Pasi policia hodhi gaz lotsjellës, protetsuesit boshatisën bulevardin, për t”u rikthyer pas pak minutash. Lulzim Basha ka marrë sërish fjalën për të dhënë mesazhet e tij për mbështetësin dhe rivalin politik.
