Ministrja e Mbrojtjes Olta Xhaçka ka udhëtuar ditën e sotme drejt Letonisë për të vizituar dy ushtarakët që mbetën të plagosur nga aksidenti i djeshëm gjatë demontimi të minave. Bëhet me dije se ministrja Xhaçka vizitoi fillimisht major Klodian Tanushin, i cili ndodhet i shtruar në një spital në kryeqytetin letonez dhe është në gjendje më të rëndë shëndetësore. Më pas ministrja e Mbrojtjes vizitoi edhe Reshter Juliaj Kapajn, i cili aktualisht ndodhet në spitalin e bazës ushtarake Camp Adazi, i cili është në gjendje të stabilizuar.
Sakaq mësohet se ceremonia shtetërore e lamtumirës për nëntetaren Zarife Hasanaj do të zhvillohet gjatë paradites së të premtes më 10 Maj 2019, teksa trupi i saj pritet të mbërrijë në Atdhe më datë 9. Trupi i saj do të transportohet me avion ushtarak dhe do të shoqërohet nga disa ushtarak të lartë të NATO-s për t’i bërë asaj nderimet më të larta sipas protokollit ushtarak.
Për ta shoqëruar do të jenë një efektiv kanadez, një letonez dhe kolegë të saj shqiptarë, pjesë e kontingjentit ku bënte pjesë. Pas ceremonisë zyrtare, efektivja Zarife Hasanaj do të dërgohet pranë familjes së saj.
