“Lajmërova policinë” Sulmohet deputeti shqiptar, tregon çfarë i ndodhi në mes të natës në garazh

Një ngjarje e rëndë ka ndodhur dje në mbrëmje ndaj deputetit të LDK në Kosovë, Shkëmb Manaj.

Ai ka treguar se dikush është futur brenda në garazhin e ndërtesës ku banon dhe i ka shpuar me thikë gomat e makinës.

Manaj bën me dije se në momentin kur ka vënë re këtë sulm që i është bërë ka njoftuar menjëherë policinë.

Sipas tij akti është kryer për shkak të detyrës, pasi ai nuk ka asnjë problem personal me askënd.

Gjithashtu deputeti ka publikuar dhe tre foto të makinës, aty ku shihet qartë se janë shpuar me thikë.

Postimi i plotë në Facebook:

Të nderuar miq, Të dashur qytetarë të Republikës, Sot rreth ores 11:00 kam vërejtur se katër gomat e vetures time, brenda garazhes në banesën ku banoj, janë shpërthyer, si rrjedhojë e shpuarjes me thikë. Rasti është lajmruar në polici, e cila ka reaguar me shpejtësi dhe e ka kryer punën e saj me profesionalizëm. Me këtë rast e falënderoj Policinë e Kosovës dhe kërkoj që rasti të trajtohet dhe të zbardhet në tërësi.

Unë, asnjëherë në jetën time nuk kam pasur dhe nuk kam asnjë problem personal me askënd. Prandaj, nëse ky veprim i ultë është tentim që unë të ndalem nga puna ime e përfaqësimit të qytetarëve në Kuvend të Republikës dhe nga angazhimi i çdo ditshëm për fuqizimin e shtetit ligjor dhe të së drejtës, e kanë gabim, sepse nuk ka forcë që me ndal nga ky përkushtim.

Duke marr paraysh që rasti është tani në procedurë hetimore, kërkoj mirëkuptimin e mediave që përtej këtij njoftimi, nuk mund të jap deklaratë tjetër, lidhur me këtë rast. Me respekt, Shkëmb MANAJ