As 5 Maji, dita që përkujton Dëshmorët e Atdheut nuk ka mundur dot ta bëjë bashkë politikën shqiptare. Në ceremonialin zyrtar ishin fillimisht Presidenti Meta, Kryeministri Rama, kryebashkiaku Veliaj e përfaqësues të mazhorancës ata të cilët zhvilluan homazhet në Varrezat e Dëshmorëve të Kombit.
Pas tyre kurora me lule përpara memorialit “Nënë Shqipëri”, në nderim të të rënëve në luftën anti-fashiste vendosën veteranë dhe të afërm të të rënëve në Luftën Antifashiste Nacionalçlirimtare.
Ndërsa, kreu i opozitës, Lulzim Basha, ish-Kryeministri Sali Berisha dhe përfaqësues të Partisë Demokratike i zhvilluan homazhet një orë pas tyre. Gjithashtu, ata kanë bërë homazhe edhe pranë vendit ku prehet Heroi i Demokracisë, Azem Hajdari si dhe në vendin ku prehen 22 intelektualët e pushkatuar nga regjimi komunist, të akuzuar për hedhjen e bombës në ish ambasadën sovjetike.
Presidenti Ilir Meta edhe këtë 5 maj, i përcolli një mesazh politikës shqiptare. Kreu i shtetit kërkoi reflektim përmes dialogut politik, si e vetmja rrugë që të çon drejt së ardhmes.
“Pikërisht sot është një ditë nderimi për sakrificat e tyre, por edhe një ditë reflektimi për të vendosur në radhë të parë interesant e vendit për të ardhmen e tij europiane, të stabilitetit, përmes dialogut, bashkëpunimit, në mënyrë që ëndrrat e tyre të realizohen plotësisht. Të nderojmë ashtu si duhet kujtimin e atyre që kanë bërë sakrificat më të mëdha, më sublime për të ardhmen e Shqipërisë”, tha Presidenti Meta.
