“E pashë me sytë e mi që ishte…” I biri i Maradonës rrëfehet pas dyshimeve për vdekjen e yllit të futbollit

Pas vdekjes së legjendës argjentinase Diego Armando Maradona, janë ngritur dyshimet e forta se ai mund të jetë vrarë me qëllim nga persona të tjerë.

Në lidhje me këtë temë ka folur dhe vetë i biri i yllit të futbollit, Diego Junior.

Ai është shprehur se vetëm pak ditë më parë se të ndërronte jetë, babai ishte në gjendje shumë të mirë.

Gjatë një interviste për mediat italiane, ai ka deklaruar se në rast se dikush ka patur faj për vdekjen e Maradonës, atëherë ai do ta paguajë shumë shtrenjtë.

“Unë kisha një telefonatë me babain pas operacionit të tij në kokë dhe folëm me video, unë e pashë me sytë e mi, ai ishte mirë dhe qeshte. Pastaj unë u infektova me koronavirus dhe e kisha të pamundur të kisha një bisedë me babain së bashku me fëmijët e tjerë. Në rast se dikush ka pasur faj për vdekjen e babait tim, atëherë do e paguajnë.

Para se të shtrohesha në spital me koronavirus, unë kërkova mjekë shtesë te babai, pas operacionit të tij. Unë isha në spital, disa miq gazetarë nga Spanja, më njoftuan për vdekjen e babait, pastaj telefonova në Argjentinë dhe ma konfirmuan këtë. Ne kishim nevojë të rrinim më shumë bashkë. Ai e meritonte të shijonte nipërit e mbesat e tij. Unë jam shumë fetar dhe mendoj se fundi i udhëtimit vjen për të gjithë ne sepse koha e Zotit është e përsosur. Unë isha i lumtur me babanë tim.”, u shpreh djali i Maradonës i përlotur.