“Mos bëni politikë me vdekjen” Najada Çomo i përgjigjet akuzave të Bashës: Shifrat nuk janë fshehur, po godisni përpjekjet tona

Pas deklaratave të djeshme të kryetarit të PD Lulzim Basha i cili u shpreh se qeveria ka fshehur numrin e viktimave nga pademia ku nga 923 janë raportuar vetëm 509, ka ardhur dhe reagimi i shefes së Infektivit Najada Çomo.

Kjo e fundit i ka cilësuar këto akuza si monstruoze dhe të dala nga shinat e së vërtetës.

Gjithashtu ajo shton se Prokuroria mund të hetojë çdo kartelë mjekësore, pasi të gjithë mjekët janë profesionale dhe në asnjë rast, nuk mundem ta ndryshojnë shkakun e vdekjes. Nëse akuza përsëritet, Çomo u bën thirrje organeve kompetente të hetojnë dhe bëjnë verifikimin e çdo kartele mjekësore

“Shprehim publikisht habinë për deklaratën e Bashës dje në një emision televiziv. Goditje e akuza të përpjekjeve tona gjithë këto muaj. Përballë akuzash të tilla e shohim të domosdoshme të informojmë publikun se, nuk është kurrësesi e vërtetë që janë fshehur vdekje nga covid, është praktikisht e pamundur, pasi çdo pacient që ndërron jetë përcillet për në morg bashkë me kartelën shoqëruese që përmban dhe arsyen e vdekjes, e cila është firmosur dhe vulosur me përgjegjësi profesionale dhe ligjore nga mjeku që e ka trajtuar deri në momentin e fundit.

Shkakun e vdekjes së një personi nuk e përcaktojnë dot politikanë, përveç mjekut përkatës. Kartelin e të ndjerit nuk e dyshojnë dot deklaratat bombastike që vënë në pikëpyetje humanizmin e autorit të tyre. Askush nuk mund ta ndryshojë dot shkakun e vdekjes dhe jo më pastaj një ekip i tërë mjekësh të akuzohet si i përfshirë në një monstruozitet me deklaratat e tilla. Bëj me dije se nëse akuza përsëritet ne do ftojmë organet kompetente të hetojnë dhe bëjnë verifikimin e çdo kartele mjekësore. Nuk do ta lejojmë këtë pa një ballafaqim qoftë ligjor apo miqësor.

Duhet t’i jepet fund praktikës politike se të lojës me vdekjen që ka sjell jo pak telashe në 30 vjet në jetën e bluzave të bardha. Kjo dalje jashtë shinave të së vërtetës në një kohë si kjo janë tejet të rrezikshme, deklaratat e figurave politike në këtë kohë duhet të jenë krejt të kundërta,”- thekson Najada Çomo në reagimin e saj.