Duhet të deklarojnë pasurinë/ OFL troket te ‘5 të fortët’ e rradhës: Keni 48 orë kohë (EMRAT)

Operacioni Forca e Ligjit ka ‘shënjestruar’ sot pesë persona me precedent të rëndë kriminal në Elbasan dhe Peqin.

Ata janë shtetasit: Mustafa dhe Dylaver Methasa, Arsen Salla, Ervis dhe Ardjan Çela të cilët duhet të deklarojnë pasurinë dhe burimin e të ardhurave brenda 40 orëve. Ndërkohë OFL thotë se përgjigjet e marra do t’i dërgohen SPAK-ut.

NJOFTIMI ZYRTAR I OFL

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

1. M., banues në Elbasan, i dënuar për veprën penale “Vrasja me paramendim”;
2. M., banues në Elbasan, i dënuar për veprën penale “Vrasja me paramendim”;
3. S., banues në Elbasan, i dënuar për veprën penale “Prodhimi dhe shitja e narkotikëve”;
4. Ç., banues në Peqin, i dënuar për veprën penale “Rrëmbimi ose mbajtja peng e personit”;
5. Ç.,  banues në Peqin, i dënuar për veprën penale “Rrëmbimi ose mbajtja peng e personit”.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.