Tronditet Elbasani/ Tritol banesës së personazhit të njohur, pak kohë më parë i vranë vëllanë

Tronditet Elbasani mëngjesin e sotëm.

Rreth orës 04:45 ka ndodhur një shpërthim i fuqishëm me eksploziv.

Mësohet se shënjestër e sulmit ka qenë banesa e të shumëkërkuarit Talo Çela.

Gjithashtu sipas raportimeve bëhet e ditur se në banesë nuk jetonte askush, dhe si pasojë e shpërthimit janë shkaktuar vetëm dëme materiale.

Policia ndodhet në vendngjarje dhe vijon hetimin dhe zbardhjen e saj.

Kujtojmë se Talo Çelës pak muaj më parë i vranë vëllain, Bujar Çelën.

Po ashtu sjellim në vëmendje faktin se Policia e Shtetit më 7 korrik të këtij viti ka vënë në dispozicion shumën prej 10 mijë eurosh për këdo që jep informacion për kapjen e 49-vjeçarit, i shpallur në kërkim kombëtar dhe ndërkombëtar për vrasjen e vëllezërve Haxhiaj në Durrës, si dhe për grabitjen e ndodhur në prill të vitit 2019 në aeroportin e Rinasit.