LIGJET E BIZNESIT
Kryebashkiakja e Romës Virginia Raggi i ka tronditur të gjithë me rrëfimin e saj të fundit.
Ajo është shprehur se grupe të krimit të organizuar kishin planifikuar të vrisnin atë dhe familjen e saj sepse ajo u goditi pronat, në lagjet e kryeqytetit italian ku ata kanë ndikim.
Raggi u bë kryetarja e parë femër e “Qytetit të Përjetshëm” në vitin 2016 kur u zgjodh.
Vitin e ardhshëm ajo do të kandidojë për tu rizgjedhur, por në një intervistë televizive të para-regjistruar tha se familja Casamonica, e njohur për aktivitetin e saj kriminal, e shënjestroi atë, pasi iu shkatërroi disa nga vilat e tyre, të ndërtuara në mënyrë të paligjshme në 2018. Kjo e detyroi kryebashkiaken të jetonte nën ruajtjen e policisë.
“Ne jemi informuar se ata po planifikonin një sulm kundër meje dhe familjes time,” – tha ajo, pa dhënë detaje të tjera.
Raggi tha se ajo po luftonte gjithashtu me klane të tjera të fuqishme mafioze, të tilla si familja Spada në lagjen bregdetare të Ostia dhe familja Marando në San Basilio, në periferi lindore të Romës.
“Ka pjesë të Romës ku njerëzit vijnë pranë meje për të më thënë të vazhdoj luftën, por më pas ata largohen sepse kanë frikë të mos shihen nga klanet,” – u shpreh ajo në intervistën për Canale 5.
Raggi ka pasur një kohë të vështirë si kryetar bashkie. Vitet e saj të para në detyrë u ndoqën nga vështirësitë ligjore dhe largimet e shumta nga administrata lokale.
Në vitin 2018 ajo u shpall e pafajshme për akuzat se kishte gënjyer për emërimin e shefit të turizmit të qytetit, një punë që i shkoi në favor të vëllait të një prej ndihmësve të saj më të ngushtë. Prokurorët apeluan kundër pafajësisë dhe një vendim i ri pritet të merret në muajt e ardhshëm.
