Një ngjarje e rëndë ka ndodhur orët e para të mëngjesit të sotëm në Fier.
Sipas njoftimit zyrtar të policisë, një person ende i paidentifikuar ka vrarë me armë zjarri 50-vjecarin Ahmet Toska në vendin e quajtur “Sheq i Madh”.
Ende nuk dihet shkaku i këtij krimi të rëndë që tronditi qytetin jugor që në orën 06:00.
Në ndihmë të policisë atje kanë shkuar dhe Forcat e Ndërhyrjes së Shpejtë dhe po krehin zonën për kapjen e autorit, si dhe janë ngritur pika kontrolli në hyrje-daljet e qytetit.
Mësohet se viktima është qëlluar në kokë me armë zjarri nga një distancë e afër, teksa kishte dalë nga banesa bashkë me të shoqen.
Toska ka qenë duke përcjellë bashkëshorten e tij për në punë, një ritual që e bënte çdo ditë, duke shtuar dyshimet se ngjarja ka qënë e planifikuar. Ka qënë pikërisht bashkëshortja e tij, dëshmitarja e dorës së parë që ka parë gjithë skenën, duke “zgjuar” gjithë lagjen me ulërima. Ajo pritet që të japë gjithë detajet lidhur me autorin e vrasjes.
Ndërkohë grupi hetimor vijon punën për zbardhjen e plotë të ngjarjes.
NJOFTIMI ZYRTAR I POLICISE:
Sot rreth orës 06:00, në lagjen “Sheq i Madh” Fier, nga një person ende i paidentifikuar, është vrarë në rrugë me armë zjarri shtetasi A. T., 50 vjeç banues në lagjen “Sheq i Madh”, Fier.
Në vendngjarje ka shkuar grupi hetimor dhe po punon për identifikimin e autorit dhe zbardhjen e plotë të ngjarjes.
Janë ngritur pika kontrolli në të gjitha hyrje daljet e qytetit dhe po vijon krehja e zonës nga shërbimet e Policisë Fier dhe FNSH Fier.