“I vetmi faj është se i shërbejnë publikut” Rama mbron Carlo Bollinon dhe bashkëshorten: Çfarë katandie!

Vijojnë replikat në distancë mes kryeministrit Edi Rama dhe presidentit Ilir Meta.

Këshilltari i Ramës për marrëdhënien me median Endri Fuga akuzoi pak më parë Metën se ka sulmuar botuesin  Carlo Bollino, ndërkohë që zëdhënësi i Presidentit Tedi Blushi e cilësoi si Fake News.

Kreu i qeverisë shkruan në rrjetet sociale se ky sulm skandaloz tregon edhe një tjetër zhytje te presidentit të republikës në bozën e vulgaritetit, brutalitetit,antishtetit!

Rama nuk ka nguruar që të marrë në mbrojtje Carlo Bollinon dhe Alba Malltezin, bashkëshorten e tij, duke shkruar që i vetmi faj që kanë kryer ato është se i shërbejnë publikut me kurajon e me profesionalizmin e tyre.

Më tej kryeministri shton se dhe Ilir Meta është i fundit shqiptar në planet që mund t’i kërkojë hesap kujtdoqoftë, jo më Albës e Carlos, për si i sigurojnë të ardhurat e tyre!

Reagimi i Ramës

Sulmi skandaloz i Ilir Metës mbi Alba Malltezin, bashkëshorten e Carlo Bollinos, është një tjetër zhytje e presidentit të republikës në bozën e vulgaritetit, brutalitetit,antishtetit! Çfarë dreqin do akoma nga Shqipëria ky njeri që ka marrë më shumë se kushdo në historinë e saj!

I vetmi faj i Alba Malltezit dhe Carlo Bollinos është se i shërbejnë publikut me kurajon e me profesionalizmin e tyre dhe Ilir Meta është i fundit shqiptar në planet që mund t’i kërkojë hesap kujtdoqoftë, jo më Albës e Carlos, për si i sigurojnë të ardhurat e tyre!Çfarë katandie!