Aksion në Rinas/ Arrestohen dy persona, ja si tentuan të korruptojnë policët (VIDEO)

Policia ka arrestuar sot dy qytetarë në Rinas me akuzën e mitdhënies.

Sipas njoftimit zyrtar nga uniformat blu, të arrestuarit tentuan të korruptojnë punonjësit e Policisë Kufitare, me qëllim lejimin për të udhëtuar drejt vendeve të BE dhe pse nuk plotësonin kushtet.

“Shërbimet e Policisë Kufitare në Rinas, në zbatim të masave parandaluese për moslejimin e udhëtimit drejt vendeve të BE-së të atyre shtetasve që nuk plotësojnë kushtet për të lëvizur në hapësirën Schengen, arrestuan në flagrancë, për veprën penale “Korrupsioni aktiv i personave që ushtrojnë funksione publike”, shtetasit:

1. A.M., 41 vjeç, banues në Tiranë;
2. Q.M., 56 vjeç, banues në Divjakë.

Arrestimi i tyre u bë pasi gjatë kontrollit të dokumentacionit dhe intervisitimit për qëllimin e udhëtimit në vendet e BE-së, këta shtetas nuk justifikonin qëllimin e lëvizjes dhe nuk plotësonin kushtet për të udhëtuar në hapsirën Schengen”, thuhet në njoftimin e policisë.

Sipas saj, shtetasi A.M. i ka ofruar punonjësit të Policisë Kufitare 50 euro, ndërsa disa orë më vonë shtetasi Q. M., i cili donte të udhëtonte bashkë me bashkëshorten, i ka ofruar punonjësit të Policisë Kufitare 100 euro, me qëllim lejimin e kalimit.