I mori jetën kunatës për Shën Valentin, prokuroria kërkon burg përjetë për Dashamir Xhepën

Ditën e sotme prokuroria ka kërkuar burg përjetë për Dashamir Xhepën.

Ky I fundit akuzohet për vrasjen e kunatës së tij më 14 shkurt 2019.

Lirie Xhepa ishte e ve prej disa vitesh, pasi i shoqi ishte ndare nga jeta nga një sëmundje e rëndë.

Dyshohet se ndërkohë pas kësaj ngjarjeje, gruaja kishte krijuar një lidhje intime me të akuzuarin.

Vrasja e 49- vjeçares Lirie Xhepa, në formën siç e rrëfyen në polici, dëshmitarët, ishte një krim i paralajmëruar.

Edhe pse ajo nuk e kishte adresuar asnjëherë në polici dhunën dhe kërcënimet që kishte marrë nga kunati i saj Dashamir Xhepa, me të cilin, sipas të gjitha të dhënave kishte një lidhje intime, duket se vazhdimisht ka jetuar me frikë.

E frikësuar nga vëllai i burrit të saj të ndjerë, që vazhdimisht kishte ushtruar dhunë ndaj saj, por edhe nga djemtë e vetë se mos e merrnin vesh lidhjen e fshehtë, ajo ishte ankuar dy herë te një punonjës Policie, duke i thënë se donte t’i jepte fund kësaj lidhjeje, pasi dhunohej sistematikisht nga kunati.

Megjithatë, viktima nuk kishte pranuar që të bënte kallëzim kundër tij, edhe nga frika e ndonjë hakmarrjeje të mundshme, por edhe nga turpi. Banorët e zonës ku ndodhi ngjarja, janë shprehur se të gjithë ishin në dijeni të lidhjes intime. Madje, edhe të dhunës së vazhdueshme që ushtrohej ndaj 49-vjeçares, por askush nuk fliste.