Instituti i Përgatitjes së Qenëve të Policisë në Tiranë ka nxjerr në shitje tre qen, përmes një ankandi publik që do të zhvillohet më datë 11 nëntor 2020. Në shitje janë Lisi, Uga dhe Astra, të cilët vlejnë nga 200 mijë lek të vjetra secili (vlera fillestare e ankandit).
Njoftimi është botuar në Buletinin e Njoftimeve zyrtare të RSH, dhe të gjithë të interesuarit duhet të paraqesin në në vendin, datën dhe orën e njoftuar pranë komisionit të ankandit, dokumentacionin si më poshtë:
1. Kërkesë me shkrim për blerje e regjistruar pranë protokollit të Ministrisë së Financave.
2. Garancinë bankare apo mandatpagesën në origjinal, që vërteton ngurtësimin e 20% të vlerës së fillimit të ankandit, në lek, për llogari të Ministrisë së Financave.
3. Dokument identifikimi (pasaportë biometrike ose letërnjoftim).
Shënim. Pjesëmarrësit në ankand, i cili tërhiqet nga ankandi pa dhënë asnjë ofertë për vlerën e shpallur për shitje, i konfiskohet 20% e garancisë bankare, e ngurtësuar për pjesëmarrje në ankand. Garancia bankare apo mandatpagesa duhet të bëhet detyrimisht brenda afatit të pranimit të kërkesave për pjesëmarrje në ankand.
Garancia bankare apo mandatpagesa mund të bëhen pranë çdo banke të nivelit të dytë në llogaritë respektive të hapura për Ministrinë e Financave, pasi të keni tërhequr pranë DDPP-së ose degëve të thesarit në rrethe faturën për arkëtim të plotësuar dhe të nënshkruar nga përfaqësuesi i institucionit. Këto informacione gjende edhe në faqen e internetit të Ministrisë së Financave dhe Ekonomisë: www.financa.gov.al