LIGJET E BIZNESIT
Protestë kundër për mbajtjes së maskave para Kryeministrisë. Gazetarja Dorjana Bezat raportoi për “BalkanWeb” se rreth 50 persona janë mbledhur për të protestuar kundër vendimit të qeverisë për vendosjen e maskave dhe në ambientet e jashtme. Ndërkohë policia ka shoqëruar 3 të rinj. Protestuesit kanë paralajmëruar se do të djegin një numër maskash në mënyrë demonstrative për të treguar kundërshtimin e tyre.
“Për t’i thënë ‘jo’ diktaturës së maskave, për ti çjerrë maskat sistemit globalist që na sundon”, tha një prej protestuesve.
Ndërsa një tjetër e cilësoi shkelje kushtetuese dhe vendimin e kryeministrit arbitrar.
“Ia vlen të protestosh dhe i vetëm kundër një ligji të padrejtë që nxjerr me akt normativ kryeministri. Kundër shkeljes kushtetuese, është një nen i veçantë mbi liritë dhe të drejtat e njeriut. Kryeministri nxjerr vendime arbitrare”, deklaroi ai.
Protestuesit kanë përzënë deputetin Kujtim Gjuzi i cili iu është afruar teksa protestonin para kryeministrisë kundër maskave. Gjuzi ka kaluar pranë por protestuesit nuk e kanë pritur mirë duke e përzënë dhe madje fyer.
