Janë kthyer sërish lëkundje e tërmetit në Shqipëri.
Sipas informacionit që jep ministria e Mbrojtjes thuhet se në orën 00.13 të mëngjesit të sotëm është regjistruar një tjetër lëkundje me magnitudë 4.0 të shkallës Rihter, në Gjirin e Lalzit.
Ky tërmet është pasuar nga 42 pasgoditje, ku më e madhja ka qenë 3.5.
Nuk ka raportime për dëme materiale.
“Në orën 00:13 ështe regjistruar një termet me madhësi 4.0 në det, përballë Gjirit të Lalzit. Është pasuar nga 42 pasgoditje, më e madhja 3.5. Nuk raportohen deme.”, thuhet në njoftimin e ministrisë.
Mbrëmjen e djeshme në orën 22:13 tërmeti me magnitudë 4.9 të shkallës Rihter goditi Shqipërinë e Mesme.
Sipas EMSC, faqes së njohur që raporton lëkundjet sizmike, tërmeti e kishte epiqendrën në detin Adriatik, 44 kilometra larg Tiranës dhe 21 kilometra larg Durrësit.
Por lëkundjet vijuan.
Pak minuta më vonë, një tjetër tërmet me magnitudë 4.2 i shkallës rihter goditi Durrësin. Ky tërmet ishte 39 km larg Tiranës dhe 23 km larg Durrësit. Kjo u pasua nga një alarm në rradhët e qytetarëve të Durrësit dhe zonave përreth, por nuk pati dëme materiale apo persona të lënduar.