“Le nam duke përgojuar gra dhe vajza” Ish-drejtoresha e Tatimeve i përvishet Murrizit: Unë kam burrëri se i tregova vendin shokëve të tu

Një përplasje në distancë është shënuar së fundmi mes ish-drejtoreshës së Tatimeve, aktualisht nënkryetare të LSI Briseida Shehaj dhe deputetit Myslym Murrizi.

Ky i fundit  e cilësoi Shehajn si “recepsioniste”, që nuk duhet të vihet në merak për partinë e tij pasi dobësohet dhe shëmtohet dhe e përzënë nga LSI, ndërkohë ajo iu përgjigj duke e quajtur “zëdhënës të rilindjes”.

Në reagimin e saj të fundit Shehaj shkruan se Murrizin e mbrojnë shokët e tij të Rilindjes, të njëjtët që ajo ua ka treguar vendin publikisht, pasi ka ca “burrëri”.

REAGIMI I PLOTE:

Disa sqarime të thjeshta për Major Lymin:
1. Të nisësh punën në arkë, në bankë është nisja normale për një sapo të diplomuar. Për pak vite, në moshën 26 vjeçare me logjikën profesionale e meritokraci, u emërova drejtore në bankë(se aty nuk të bën miku drejtor).
2. Jam larguar nga tatimet në vitin 2016 dhe deri me sot as ata që të keqinformojnë me qëllim nuk gjetën dot një akuzë të vetme për mua për korrupsion.
3. Unë pagat e mia i kam patur nga dita e parë e punës e gjer më sot të deklaruara. Burimi im i jetesës. Nuk pres unë leje ndërtimi as nga Kavaja, apo Sauku.

4. Një këshillë, meqë përvoja në media më ndihmoi ta kuptoj edhe më mirë rëndësinë e lajmit përballë shpifjes: para se të deklarohesh mbi mua bën mirë të informohesh saktë, je aq pranë Rilindasve sa për të mos bërë gafa, që as ata nuk ia lejojnë vetes, por të keqpërdorin.
   5. Një deputet, qoftë edhe ti Lym bën mirë të merret me hallet e panumërta të një vendi nga ku iket masivisht, e jo të përgojosh gra e vajza, që kanë vendosur të qëndrojnë pa tradhtuar parime. Ti këtë nuk e kupton dot, por të paktën sillu si Major! Se le nam duke përgojuar edhe Kombinat e Kodër Dielli, se ke edhe shokët e tu rilindas, që të mbajnë me të mira ty, sa për mua, kam ca burrëri se ua kam treguar vendin publikisht.