LIGJET E BIZNESIT
Kalimi i Drejtorisë së Transportit Rrugor tek Tirana Logistic Park është vërtetë një vendim i paarsyetueshëm. Duke patur zyrat e veta, institucioni shtetëror largohet në zyrat private duke paguar 20 mijë dollarë në muaj. Po ku po i çon Qeveria paratë tona? Kush janë pronarët e Tirana Logistic Park?
Siç mund ta shihni nga ekstrakti i depozituar në QKB, evidentuar nga Dosja.al, ky biznes është pronë e 3 kompanive, Balfin SHPK, AAEF dhe ALB-STAR sh.p.k.. Balfin Group me 64.41 për qind të aksioneve, është I njohur për publikun si pronë e biznesmenit më të madh në vend Samir Mane, AAEF me 18.49 për qind është Fondi Shqiptaro – Amerikan i ndërmarrjeve, i drejtuar nga Michael Granoff dhe ALB-STAR me 17.1 për qind është kompani shqiptare e me administrator dhe ortak të vetëm Sadik Ismailaj.
Siç duket qartë, maxhorancë absolute e Tirana Logistic Park është Samir Mane, i njohur për influencën vendimmarrëse tek Kryeministri, një nga ata që janë përfshirë në listën e oligarkëve, grupit të vogël që kontrollon ekonominë dhe politikën.
Vendimi i Qeverisë pra, për t’i paguar 20 mijë euro, është i diktuar nga një grup i fortë ekonomik. Nëse ky është deduksion, fakti është që 20 mijë euro në muaj, ose 240 mijë euro në vit që u merren shqiptarëve si taksa, do t’i paguhen një biznesi të madh.
Në 23 nëntor 2018, Edi Rama deklaronte me krenari se e hoqi OSHEE nga zyrat private, në pallatin e Ylli Rakipit, për ta çuar në ndërtesën shtetërore (shiko videon). Ajo kontratë ishte bërë kur OSHEE ishte CEZ, pra ishte një kompani private çeke.
Për ndërtesën e re të OSHEE u shpenzuan mbi 5 milionë euro përsëri nga tarifat e energjisë, përfitimi i kompanisë publike do të ndihet pas 10 vjetësh. Ndërsa, këtu është e kundërta, një drejtori publike, e cila nuk ka statusin e Shoqërisë Aksionere, heq dorë nga zyrat e shtetit, për të paguar tek privati.
Kështu 20 mijë euro çdo muaj që dalin direkt nga buxheti i Shtetit (lexo nga xhepat e shqiptarëve) do të shkojnë për një nga bashkëpunëtorët e Kryeministrit që dikur bënte sikur po kursente paratë e shqiptarëve, duke ia hequr kontratën kritikuesit të tij./ Dosja.al
