Mjeku i njohur Erion Dasho përmes një statusi të publikua në rrjetet sociale, ngre alarmin se tetori rrezikon të inkubojë virusin dhe në nëntor e dhjetor të përballemi me pasoja të paparashikueshme.
“Gjatë gjithë pandemisë u jam shmangur parashikimeve mbi valën, pikun, kurbën, sheshimin etj., sidomos kur ato mund të ngjanin të zymta. Por situata e sotme kërkon kujdes të veçantë. Nëse nuk merren masa sot, tetori rrezikon të inkubojë COVID-in dhe nëntor-dhjetori rrezikon një shpërthim me pasoja të paparashikueshme. Këto janë pritshmëritë në Europë dhe duhet të mbahen parasysh edhe për Shqipërinë!”, apelon Dasho.
Sipas tij, për të pasur nën kontroll situatën, krahas rritjes së nivelit të testimeve, duhet edhe gjurmim dhe raportim digjital i simptomave për të mundësuar identifikimin e hershëm si edhe çfarë është më e rëndësishme trajtimi në kushtet e shtëpisë të bëhet duke ndjekur protokolle të qarta mjekimi për të shmangur kështu efektet anësore që mund t’u kushtojnë jetën qytetarëve.
“Në këto kushte është domosdoshmëri: Së pari një kapacitet testues, minimumi 2.500 teste në ditë. Testet në përdorim duhet të jenë ato që testojnë njëkohësisht për 10 agjentë viralë. Kjo do të mundësojë diagnozën diferenciale aq të dobishme kur ka mbivendosje patogjenësh. Së dyti, gjurmimi dhe raportim dixhital i simptomave të virozave (pa bërë dallim COVID apo viroza të tjera) nga mjekët e familjes dhe nga vetë qytetarët. Kjo do të mundësojë identifikimin e hershëm të vatrave dhe do të orientojë testimin. Dhe së treti trajtim në kushtet e mjekësisë së familjes me protokolle të qarta dhe standarde monitorimi. Ndryshe, rrezikojmë që deri në maj çdo shqiptar të ketë marrë të paktën 2-3 cikle antibiotikësh dhe antikoagulantësh, çka do të bëjë që më shumë njerëz të humbin jetën nga efektet anësore të mjekimit se nga vetë COVID!”, ka shkruar doktori.