Partia Demokratike ka paditur ditën e sotme kryetarin e Bashkisë së Tiranës, Erion Veliajn për shpifje.
Nëpërmjet kësaj padie, kërkohet dënim maksimal për kryebashkiakun, pasi akuzohet se ka thënë tre mashtrime për kryetarin demokrat, Lulzim Bashën.
Sipas PD-së tre shpifjet e Erion Veliajt janë: Kryetari i PD u bë me 4 shtëpi gjatë tërmetit dhe pandemisë. Kryetari i PD ka përfituar gjatë periudhës së fatkeqësisë. Kryetari i PD ka ndërtuar kate pa leje.
“Këto të pavërteta janë bërë me qëllim dëmtimin e reputacionit dhe dëmtimin e imazhit në mënyrë të qëllimshme, duke qenë se Lulzim Basha është Kryetar i PD në opozotë dhe Erion Veliaj, si drejtues i fushatës zgjedhore të PS për qarkun e Tiranës, këto deklarime shpifëse i përdor për të përfituar kredo politike përballë qytetarëve, si për vete dhe për PS”- thuhet në padinë e ngritur për shpifje ndaj Erion Veliajt.
Kjo padi e PD-së vjen 2 ditë pasi kreu i Bashkisë së Tiranës, Erion Veliaj akuzoi kreun e Partisë Demokratike se në këmbim të mbylljes së protestës së Astirit, ka marrë katër vila. Nga Njësia numër 1 në Tiranë, Veliaj deklaroi se Basha vendos gjoba, dhe në një vit kaq të vështirë ekonomik për shkak të pandemisë, ai dhe kunati i tij, janë pasuruar.