Gjykata për Krime të Rënda ka lënë në burg ish komandon Erzen Uka, i arrestuar për nxitje terroriste, vetëm pak ditë më parë.
Prokurori i çështjes, Eugen Beci, kërkoi arrest me burg, ndërsa Uka nuk ka pranuar të ngrihet në këmbë para trupit gjykues, duke thënë se respekton vetëm Allahun dhe ka kërcënuar prokurorin Eguen Becin dhe gjyqtarin.
Para trupit gjykues 29-vjeçari është shprehur se gjykatësi dhe prokurori do i japin llogari pasi ai të dalë nga burgu.
“Sa të dal do jepni llogari. Nuk do kalojë kollaj.”, është shprehur ai.
Uka akuzohet për 3 vepra penale, stërvitja për kryerjen e veprave penale me qëllime terroriste, nxitja, thirrja publike dhe propaganda për kryerjen e veprave penale me qëllime terroriste dhe prodhimi dhe mbajtja pa leje e armëve luftarake dhe municionit.
Seanca u zhvillua me dyer të mbyllura ndërsa gjykata u tërhoq për vendim.
I riu i lindur në Gjorm të Krujës dhe banues në Tiranë ka qenë i proceduar më parë për dhunë në familje dhe pengim të ekzekutimit të vendimit të Gjykatës.
Prej vitesh ai ishte pikasur si person që shfaqte prirje radikale, ndërsa dy vitet e fundit po hetohej për çështje terrorizmi.
I arrestuari, aktualisht ishte i divorcuar, ndërsa, sipas Policisë, pasi e shoqja e kishte denoncuar për dhunë në familje dhe më pas ishte ndarë me të, ai nuk e kishte lejuar që dy djemtë e tij t’i mbante e ëma, edhe pse Gjykata kishte urdhëruar dhënien e kujdestarisë të ëmës.
