Forca të shumta policore dhe fadroma kanë zbarkuar mëngjesin e sotëm te Bregu i Lumit për të prishur banesat. Një situatë që ka shkaktuar tension, siç duket nga një video e shpërndarë nga Partia Demokratike.
Shembja e banesave te Bregu i Lumit do të bëhet në kuadër të projektit të zgjatimit të Bulevardit të Ri. Por banorët kundërshtojnë dhe kanë deklaruar se nuk do të lejojnë që banesat e tyre të preken. Ata kërkojnë dëmshpërblim dhe jo vendosje në banesat sociale, siç ka premtuar Bashkia e Tiranës.
Pranë banorëve, në mbështetje të tyre kanë shkuar mëngjesin e sotëm edhe deputetët e Partisë Demokratike, Klevis Balliu dhe Jorida Tabaku. Ka qenë pikërisht deputeti Balliu që ka publikuar në facebook edhe videon nga Bregu i Lumit.
“BARBËRI DHE KAFSHËRI PUSHTUESI
Edvin Rama po kryen akte barbare ndaj banorëve të Bulevardit të Ri.
Po vret qytetarët brenda shtëpive të tyre. Gaz lotsjellës brenda në shtëpitë e qytetarëve, duke kërcënuar seriozisht jetën e banorëve.
Dhunë barbare prej pushtuesi. Disa qytetarë janë shoqëruar në Komisariatin 4 dhe janë dhunuar barbarisht. Një gruaje të shoqëruar në rajon i kanë thyer këmbën dhe një tjetër burri i kanë çarë kokën.
Akte prej banditësh ndaj qytetarëve të këtij vendi”, shkruan ai lidhur me ngjarjen.
