LIGJET E BIZNESIT
Nafta dhe benzina pritet të kushtojnë mbi 30 lekë më pak për litër nga janari 2027. Lajmi është bërë i ditur nga ministrja e Ekonomisë dhe Inovacionit, Delina Ibrahimaj, e cila theksoi se ulja e çmimeve do të sjellë lehtësim të drejtpërdrejtë për qytetarët dhe bizneset. Sipas ministres, për një automjet me një depozitë prej 50 litrash, kursimi do të arrijë në rreth 1500 lekë për çdo mbushje. “Kur mbushni makinën tuaj me 50 litra, kjo do të thotë se ju do të paguani rreth 1500 lekë më pak, çdo herë”, u shpreh Ibrahimaj.
Ajo nënvizoi se përfitues të kësaj politike do të jenë jo vetëm drejtuesit e automjeteve, por edhe transportuesit, fermerët dhe bizneset, të cilat përballen me kostot e karburantit. Ministrja argumentoi se ulja e çmimit të naftës dhe benzinës mund të ndikojë edhe në çmimet e produkteve, përmes reduktimit të kostove të transportit dhe prodhimit.
“Kur transporti kushton më pak, edhe mallrat në dyqan do të kushtojnë më pak, pasi kostot e prodhimit bëhen më të lira”, deklaroi ajo. Ibrahimaj bëri të ditur se qeveria do të monitorojë zbatimin e uljes përmes Bordit të Transparencës, me qëllim që ndryshimi të reflektohet në të gjitha pikat e karburantit në vend.
“Ulja do të vijë menjëherë dhe ne do të garantojmë që, nëpërmjet Bordit të Transparencës, ajo të përcillet në çdo pompë, në çdo qytet”, u shpreh ministrja.
Sipas saj, kjo masë synon të reduktojë shpenzimet e përditshme të qytetarëve, nga udhëtimi drejt punës deri te transporti i fëmijëve në shkollë. Ulja e paralajmëruar e karburanteve pritet të ndikojë në një nga shpenzimet e rëndësishme të familjeve shqiptare, ndërsa efekti në çmimet e produkteve do të varet nga mënyra se si reduktimi i kostove të transportit do të përcillet në treg.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
