Dje u arrestua, Apeli liron ish-kryebashkiakun e Vorës Agim Kajmaku

Gjykata e Apelit ka liruar sot ish-kryetarin e Bashkisë së Vorës, Agim Kajmaku.

Ky i fundit u arrestua ditën e djeshme pas 11 muajsh në kërkim nga policia.

Ndërkohë Apeli caktoi gjatë seancës masën e sigurisë “detyrim paraqitje”.

Agim Kajmaku u arrestua në ambientet e një spitali në Tiranë, ku po mjekohej për shkak se ishte në gjendje të rënduar nga diabeti.

Kujtojmë se ish-numri një i Bashkisë Vorë kërkohej që në 11 nëntor të vitit 2019, me urdhër të Prokurorisë, pasi akuzohej për “falsifikim i vulave dhe formularëve”, “falsifikim i dokumenteve zyrtare” dhe “kryerja e funksionit pas dhënies fund të tij”.

Fillimisht Kajmaku është denoncuar nga Partia Demokratike për fshehje të dënimit në formularin e Dekriminalizimit, pasi nën emrin Jorgo Tota ai ishte dënuar në Greqi për falsifikim parash.

Pas hetimeve dhe verifikimeve nga Prokuroria, akuzat e opozitës rezultuan të vërteta, duke bërë që KQZ ta shkarkojë atë nga detyra e kryebashkiakut.

Pas kësaj, ai u shpall në kërkim për shkelje të ligjit të Dekriminalizimit, por edhe për ushtrim të funksionit pas shkarkimit nga detyra.

Kjo, pasi ai kishte firmosur shkarkimin e dy nënkryetarëve të Bashkisë Vorë, pasi vendimit të KQZ për shkarkimin e tij.