Fermerët nuk kanë besim te AZHBR. Faktin e pranon vetë drejtoresha e institucionit

NGA AURORA SULÇE

Agjencia për Zhvillim Bujqësor dhe Rural është institucioni që me ligj shpërndan subvencionet për fermerët,. E thënë ndryshe, paratë që destinohen nga buxheti i shtetit për ata që merren me bujqësi dhe blegtori. Më 19 qershor u mbyllën aplikimet për skemën kombëtare të mbështetjes për fermerët, e cila në total kapte një vlerë prej 7.43 miliardë lekëve të vjetra, ekuivalent me rreth 6 milionë euro.

Thirrjes së AZHBR-së për të përfituar nga këto subvencione iu përgjigjën, sipas njoftimit zyrtar të këtij institucioni, vetëm 7653 fermerë. Ndërkohë që zyrtarisht të regjistruar pranë Drejtorisë së Përgjithshme të Tatimeve sipas listës së përditësuar më 6 korrik 2020, janë 47.027 fermerë aktivë (link më poshtë).

https://www.tatime.gov.al/c/8/129/326/lista-e-fermereve-aktive

Sipas një përllogaritje të thjeshtë, i bie vetëm 16.2% e totalit të fermerëve të pajisur me NIPT, të cilët zyrtarisht duhet të aplikojnë për të përfituar subvencione. Një nivel i tillë kaq i ulët tregon për mungesën e besueshmërisë ndaj këtij institucioni dhe ky është problem shumë shqetësues.

Mungesën e besimit tek institucioni, që me ligj është i ngarkuar për të shpërndarë fondet që jepen nga paratë e taksapaguesve shqiptarë për fermerët, e pranon edhe vetë drejtoresha e Përgjithshme e Agjencisë për Zhvillim Bujqësor dhe Rural, Frida Krifca.

Në faqen e saj në facebook, ku pasqyron edhe aktivitetin e institucionit që drejton dhe takimet zyrtare që zhvillon, Krifca tregon për takimin me një bari, të quajtur Preka, i cili nuk e ka njohur drejtoreshën e institucionit të rëndësishëm që qarkullon milionat për fermerët. Madje, edhe pas prezantimit, sërish Preka, sipas asaj që vetë drejtoresha Frida Krifca shkruan, tregon se nuk ka aplikuar për fonde pranë AZHBR-së, pasi nuk ka besim se do të marrë ndonjë gjë. Postimi i drejtoreshës është shpërndarë edhe në faqen zyrtare të Agjencisë për Zhvillim Bujqësor dhe Rural në facebook.

Më poshtë kemi postuar statusin e plotë të Frida Krifcës, e cila nuk e drejton Agjencinë për Zhvillim Bujqësor dhe Rural prej 1 muaji apo 1 viti dhe nuk ka pasur kohë të krijojë besimin e fermerëve, por plot 3 vite. Ajo u emërua në krye të këtij institucioni në korrik të vitit 2017.

POSTIMI I PLOTË I FRIDA KRICËS:

Preka po zbriste malin duke i fishkellyer dhive qe ti mbante ne tufe. Ato mezi i bindeshin dhe haperdaheshin nga era e shkurreve me arome bjeshkesh. E prita te zbriste qe ta pershendes. Ju prezantova dhe pse me pa i painteresuar. Nuk kam aplikuar tha, nuk dua, nuk kam besim se marr gje.

I shpjegova Prekes te verteten e Agjencise. Punen qe bejme. Folem pak per femijet, blegtorine, per veshtiresite, problemet, te miren dhe te bukuren e zones. Pas nje cope here, me buzeqeshi me sy te medhenj jeshile dhe me ftoi ne shtepi per nje gote ‘tamel’.

Gjate kesaj periudhe, jam njohur nga afer me blegtorine e te imtave dhe kam takuar shume çobane. Ndalon makina sa here ndeshim ndonje tufe rruges.