Përfaqësuesi i Opozitës Parlamentare, Myslim Murrizi ka folur pas takimit të zhvilluar me kryeministrin Edi Rama. Murrizi u shpreh se nuk u arrit asnjë marrëveshje, pasi Rama e ka marrëveshjen me PD e LSI.
Deputeti theksoi se ai bashkë me kolegët nuk do ta votojnë marrëveshjen e 5 qershorit nëse nuk happen listat dhe të zbatohen rekomandimet e OSBE/ODIHR.
Ndër të tjera, Murrizi u shpreh se Rama dhe Basha nuk i duan listat e hapura, pasi duan t’i kenë shqiptarët vetëm si votues, jo si zgjedhës.
Deklarata e Murrizit:
Nuk pati marrëveshje, sepse Rama vazhdon ta ketë marrëveshjen me ata të cilët e gatuan këtë sistem zgjedhor që i mohuan votën shqiptarëve që në 2008. Ne jemi këtu për të thënë që nuk jemi për të votuar çdo lloj pazari në kurriz të shqiptarëve. Ata kanë hall pushteti, ne kemi hallin e shqiptarëve. Nuk votojmë nëse nuk hapen listat e kandidatëve dhe të zbatohen pikë për pikë rekomandimet e OSBE/ODIHR. Që njëherë të vetme në këto 30 vite procesi të jetë i pakontestueshëm nga palët politike. Ne Ramës ia bëmë të qartë që mund të vazhdojë pazarin me PD, por votat tona nuk janë pro marrëveshjes së tyre. Rama nuk është pro listave të hapura, si Basha dhe Kryemadhi. Ata i duan shqiptarët si votues, jo si zgjedhës. Ne nuk jemi zemëruar, jemi takuar dhe do të takohemi. Gjithmonë për sistemin zgjedhor dhe pro listave të hapura apo për çdo gjë që ka lidhje me interesin e shqiptarëve. Për tendera, për koncesione për pazare janë ata që takohen natën dhe bëjnë sikur shahen ditën.
