‘Zhbllokohet’ Gjykata e Lartë/ Zgjidhet zv.kryetari i ri, por që do të ketë kompetencat e kryetarit (EMRI)

Sokol Sadushi është zgjedhur zv.kryetar i Gjykatës së Lartë.

Por pavarësisht këtij vendimi, ai do të ketë dhe kompetencat e kryetarit.

Kujtojmë që Gjykata e Lartë ishtë pa kryetar që nga shkarkimi i Ardian Dvoranit.

Zgjedhja e Sokol Sadushit u bë në mënyrë unanime, në mbledhjen e përgjithshme të gjyqtarëve të Gjykatës së Lartë, këtë të martë.

Kështu, deri në zgjedhjen e Kryetarit të Gjykatës së Lartë, Sadushi do të ushtrojë kompetencat e kryetarit.

Sadushi ka ushtruar detyrën e Drejtorit të Shkollës së Magjistraturës prej muajit nëntor të vitit 2014, detyrë që e ka vazhduar deri më datë 13 mars 2020, në mandatin e tij të dytë të dhënë nga Këshilli Drejtues i Shkollës së Magjistraturës. Por u largua pasi së fundmi u emërua Gjyqtar në Gjykatën e Lartë.

“Referuar kërkesave të nenit 26, pika 3 të Ligjit nr. 98/2016 “Për organizimin e pushtetit gjyqësor në RSH” si dhe të vendimit Nr. 7, datë 21.12.2018 “Rregullore për miratimin e rregullave për zgjedhjen e zëvendëskryetarëve të gjykatave” të Këshillit të Lartë Gjyqësor, që parashikojnë zgjedhjen e zëvendëskryetarit nga rradhët e gjyqtarëve të Gjykatës së Lartë, pas procesit të verifikimit të përmbushjes së kritereve ligjore për kandidaturën e paraqitur, në prani të 3 gjyqtarëve dhe të 4 ndihmësmagjistratëve të komanduar dhe me të drejtë vote, Mbledhja e Përgjithshme vijoi me kryerjen e procedurës së votimit. Në përfundim, rezultoi i zgjedhur me unanimitet me 7 vota, Z. Sokol Sadushi, si zëvendëskryetari i Gjykatës së Lartë”, thuhet në njoftimin zyrtar.