Lajmi i arrestimit të ish-kryebashkiakut të Vorës Agim Kajmaku bëri shumë bujë mëngjesin e sotëm.
Kajmaku kërkohej nga policia që nga 11 nëntori i 2019, pasi Prokuroria firmosi urdhër-arrest për të.
Ndërsa sot në mëngjes mësohet se ai u arrestua në një spital privat të Tiranës.
Sipas burimeve të policisë Agim Kajmaku u shtrua gjatë mesnatës, dhe avokati ka lajmëruar policinë.
Më pas, uniformat blu bënë të mundur arrestimin e tij. Raportohet se Kajmaku u paraqit në spital në gjendje të rënduar, pasi vuan nga diabeti.
Kujtojmë se fillimisht Agim Kajmaku u denoncua nga Partia Demokratike për fshehje të dënimit në formularin e Dekriminalizimit, pasi nën emrin Jorgo Toto, ishte dënuar në Greqi për falsifikim parash. Pas hetimeve dhe verifikimeve nga Prokuroria, akuzat e opozitës rezultuan të vërteta, duke bërë që KQZ ta shkarkojë atë nga detyra e kryebashkiakut.
Akuza tjetër lidhet me shkarkimin nga Kajmaku të dy nënkryetarëve të Bashkisë pasi KQZ i kishte hequr mandatin.
Ndaj tij, gjykata e Tiranës ka caktuar masën e sigurimit “arrest me burg”, por që deri më tani ishte e pa ekzekutuar.
Mbi të rëndojnë akuzat e “falsifikimit të formularëve”, “falsifikimit të dokumenteve” dhe “kryerje e funksionit pas dhënies fund të tij”.
