“Më trishtoi pa masë” Reagimi i fortë i Manastirliut pas ndarjes nga jeta të mjekut të njohur

Pas ndarjes nga jeta të mjekut Hysni Shkjau, i cili ishte i shtruar në Spitalin Infektiv dhe humbi jetën nga COVID19, ka ardhur dhe reagimi i ministres së Shëndetësisë Ogerta Manastirliu.

Kjo e fundit shkruan se ky lajm e ka trishtuar pa masë dhe shprehet me konsiderata të larta duke vlerësuar kontributet e doktorit në zonën ku ai shërbeu për vite me rradhë.

“Më trishtoi pa masë lajmi për ndarjen nga jeta këtë mëngjes e dr. Hysni Shkjaut, mjekut të përkushtuar, që shërbeu pa u lodhur dhe nuk u nda për asnjë ditë nga banorët e komunitetit në zonën e Qafë-Malit në Pukë!

Ndarja nga jeta e dr. Hysniut është një dhimbje e madhe për të gjithë ne, për familjen, për kolegët, për banorët e zonës së Pukës, ku shërbeu për 40 vite me përkushtim e profesionalizëm.

Dr. Hysniu nuk mundi ta fitonte betejën me virusin e rrezikshëm, megjithë përpjekjet e mjekëve, të cilët bënë të pamundurën për ta mbajtur në jetë në spitalin infektiv.

Ngushëllime të sinqerta familjes dhe kolegëve! U prehsh në paqe doktor Hysniu!”- shkruan Manastirliu.