Situata alarmante nga pandemia/ Pas 8 viktimave, qeveria e Kosovës mblidhet urgjentisht

Duket se situata nga pandemia e COVID19 në Kosovë vijon të jetë alarmante.

Pas 8 viktimave vetëm gjatë ditës së djeshme, kryeministri Avdullah Hoti ka vendosur të nisë një mbledhje urgjente me qeverinë dhe krerët e institucioneve shëndetësorë në vend.

Lajmin e bën me dije zyra e Kryeministrit, e cila njofton se takimi do të zhvillohet sot në orën 13:00.

“Kryeministri Avdullah Hoti pret në takim drejtuesit e institucioneve shëndetësore. VENDI: Ndërtesa e Qeverisë. KOHA: 13:00. Pas takimit do të ketë konferencë për media”, thuhet në njoftim.

Instituti Kombëtar i Shëndetësisë Publike të Kosovës (IKSHPK) ka njoftuar se janë konfirmuar edhe 178 raste të reja me koronavirus në vend. Numri i të infektuarve me koronavirus ka shkuar në 3356.

Lajmi u bë i ditur nga Instituti Kombëtar i Shëndetësisë Publike të Kosovës (IKSHPK), përmes një njoftimi në Facebook.

“Sot më 05 korrik 2020, janë shëruar 50 pacientë derisa numri i përgjithshëm i të shëruarve deri më sot është gjithsej 1.874 raste, kurse raste aktive 1.416”, thuhet në njoftim.