Regjisori i njohur Robert Budina bën pjesë në listën e personave të njohur në Shqipëri, i cili rezultoi pozitiv me COVID19 së bashku me vëllain e tij, Edmond Budina.
Mbrëmjen e djeshme ai ka publikuar një video, ku ka paralajmëruar se do të ndjekë penalisht këtë cështje, pasi publikimi i emrit të tij nga kryeministri Edi Rama në listën e personave të infektuar, përbën një vepër penale dhe ka treguar dyshimet se nga ku mund të ketë marrë virusin.
Mësohet se Budina në testin e fundit ka rezultuar negativ, ndërkohë që ka vijuar protestën për rindërtimin e Teatrit aty ku ishte dhe siç ishte.
Regjisori shfaqet në terren, te sheshi i Teatrit Kombëtar, i cili tashmë është shembur ndërsa ka treguar eksperiencën e tij me Covid-19.
“Do t’i shkoj deri në fund të vërtetës se me çfarë të drejte kryeministri ndërhyn në jetën personale të aktivistëve të mbrojtjes së Teatrit. Kur ky kryeministër dhe kryetar Bashkie duhet të mendojnë për punonjësit e tyre që të mos i zërë koronavirusi, mendojnë të mbyllin Teatrin Kombëtar.
Koronavirusin nuk e merr nëpër protesta. Edhe unë që më nxorën me koronavirus dhe nuk e dimë si është e vërteta, rashë në kontakt me njerëz të infektuar nga spitali Infektiv dhe e mora. Ndërsa në protesta duke takuar dhjetëra apo mijëra njerëz nuk e mora”, deklaroi regjisori Budina.
