LIGJET E BIZNESIT
Komisioni i Pavarur i Kualifikimit ka shkarkuar nga detyra gjyqtaren e Apelit Shpresa Beçaj, e cila nuk ishte pjesë e seancës.
Më 1 korrik KPK deklaroi se Beçaj nuk ka dorëzuar deklaratën e pasurisë pranë ILDKPI-së, as deklaratën e pastërtisë së figurës dhe as të vlerësimit professional. Kështu nuk përmbushte detyrimin ligjor për t’u përballur me Vetting-un.
Avokati mbrojtës i Beçaj, Julian Mërtiri tha se nuk arrin ta kuptojë nëse gjyqtarja ishte subject rivlerësimi si ish-gjyqtare apo gjyqtare dhe e cilësoi relacionin e KPK-së jo të saktë.
Mërtiri tha se Beçaj nuk ka qenë e detyruar të dorëzojë deklaratat, pasi në kohën që ato duheshin plotësuar, ajo ushtronte profesionin e avokates dhe jo gjyqtares.
Por tashmë vendimi u mor nga KPK, ku trupa gjykuese e përbërë nga Suela Zhegu, Roland Ilia dhe Lulzim Hamitaj vendosi ta lërë Beçajn jashtë sistemit të drejtësisë.
Shpresa Beçaj ka përfunduar studimet në drejtësi në vitin 1983 dhe e ka filluar karrierën si gjyqtare nga Gjykata e Gramshit. Ajo u emërua gjyqtare në Tiranë në vitin 1990 ndërsa në vitin 1994 u promovua si gjyqtare e Apelit të Tiranës.
Në vitin 2004, Beçaj u dekretua gjyqtare në Gjykatën e Lartë ndërsa 4 vjet më pas u emërua kryetare e kësaj gjykate. Me përfundimin e mandatit në vitin 2013, Beçaj udhëhoqi një betejë ligjore kundër Këshillit të Lartë të Drejtësi për t’u rikthyer në Gjykatën e Apelit të Tiranës dhe e fitoi atë. Megjithatë, vendimi për emërimin e saj në Gjykatën e Apelit u shty deri në vitin 2018.
