Kanë dalë detaje të reja në lidhje me ngjarjen e rëndë që ndodhi mesditën e sotme në Shkodër.
Në fshatin Vukatanë u qëllua me breshëri në drejtim të një automjeti në ecje.
Sipas informacioneve bëhet me dije se në shënjestër ka qenë 30-vjeçari Fatjon Harusha, kushëriri i deputetit të Partisë Socialiste në Shkodër, Luan Harusha.
Dyshohet se autorët kanë qenë 2 persona me motorr, madje njëri prej tyre femër me bluzë të bardhë, ku bashkë me të ishte dhe një mashkull.
Policia ndërkohë doli me njoftim zyrtar ku thuhej se rreth orës 12:30, ku në rrugën e fshatit Vukatanë, Shkodër, në rrethana ende të paqarta është qëlluar me armë zjarri në drejtim të mjetit tip “Hyundai”, me drejtues shtetasin Fatjon Harusha 30 vjeç, banues në fshatin Dobraç, Shkodër.
NJOFTIMI ZYRTAR I POLICISE
Shkodër/Informacion paraprak
Më datë 29.06.2020, rreth orës 12:30, në rrugën e fshatit Vukatanë, Shkodër, në rrethana ende të paqarta është qëlluar me armë zjarri në drejtim të mjetit tip “Hyundai”, me drejtues shtetasin F. H. 30 vjeç, banues në fshatin Dobraç, Shkodër. Nga të shtënat nuk ka asnjë person të lënduar.
Menjëherë në vendngjarje kanë shkuar shërbimet e Policisë dhe grupi hetimor.
Si rezultat e veprimeve të shpejta janë shoqëruar disa persona dhe dyshohet se mes tyre mund të jenë edhe autorët e ngjarjes.
Vijon krehja e zonës dhe grupi hetimor po vijon punën për fiksimin e çdo prove që mund të shërbejë për sqarimin e rrethanave të ngjarjes dhe identifikimin e autorëve.