Arti shqiptar në zi, ndahet nga jeta mjeshtri i valles popullore

Një lajm i hidhur është sot ai që vjen për artin dhe muzikën shqiptare.

Mësohet se është ndarë nga jeta në moshën 84-vjecare mjeshtri i valles popullore Besim Zekthi.

Ai mbante titullin e lartë “Nderi i Kombit”.

Lajmin e ka dhënë Teatri Kombëtar i Operës, Baletit dhe Ansamblit Popullor, ku thuhet se Zekthi vuante nga një sëmundje e rëndë, dhe ndërroi jetë në banesën e tij në Tiranë sot pasdite.

“Teatri Kombëtar i Operës, Baletit dhe Ansamblit Popullor, me hidhërim të thellë njofton ndarjen nga jeta të mjeshtrit të valles popullore mbarëshqiptare, “Nderi i Kombit” – Besim Zekthi.

Artisti humbi betejën me një sëmundje të rëndë, në moshën 84 vjeçare, në shtëpinë e tij në Tiranë, rreth një orë më parë.

Teatri Kombëtar i Operës, Baletit dhe Ansamblit Popullor, i shpreh ngushëllimet familjarëve, të afërmve, miqve, bashkëpunëtorëve dhe admiruesve që e duartrokitën gjatë gjithë karrierës së tij mjeshtrin e valles shqiptare, të pazëvendësueshmin, Besim Zekthi.”, thuhet në njoftimin zyrtar të institucionit të kulturës.